ZELF SJÖLDJ

Doe zous ’t oet wille sjrewe, mer biets oppe tenj.
Wie ’n sjaop veur de leeuwe, biets se oppe tenj.
Toch zou se gaer wille zègke, det ’t effe neet löp.
Ich kal mer mit es se kalle, weit waat gebeurt.
Ich lach mer mit es se lache, want ich weit waat gebeurt.
Es ich zou zègke det ’t effe noe neet zo lekker löp.

Eige sjöldj, dieke böldj, doe bös ’t zelf sjöldj.
Ze zègke: eige sjöldj, dieke böldj.
Haajs se dit of det gelaote, woor de deur noe neet gesjlaote, zelf sjöldj.

Doe wóls ‘s gaer effe kalle, de ozel effe kwiet.
Mer dinks allein mer aan valle, en alles is te wiet.
Dus blief se verder zjwiege, den duit nemes dich pien.
Doe druims allein van die druime, van det get gebeurt.
Doe haops op desse kèns haope, det get gebeurt.
Mer doe zjwiegs,want den duit nemes dich pien.

Eige sjöldj, dieke böldj, doe bös ’t zelf sjöldj.
Ze zègke: eige sjöldj, dieke böldj.
Haajs se dit of det gelaote, woor de deur noe neet gesjlaote, zelf sjöldj.

’N TAS EN ‘NE LAERE JAS

Ich zoog ‘m bie de sjtasie en hae zóch get in zien tas
Net wie toen ouch noe weer zónne broene laere jas
Hae kwoom al op mich aaf veurdet ich get haaj gezag
En lachde net wie vreuger ‘ne volle breije lach
De aadste van veer kinjer, de sjnelste vanne sjtraot
En eder weekend wèrkde hae zich toen al oet de naod
Zien vader óngerwiezer, hae bès aardig óm te zeen
Zie woonde oppe hook bie ós op nummer zeveteen.

En alles waat d’r haet zit in die klein plastic tas
Die d’r sjnachs versjtop in dae gevónje laere jas
De druime die d’r druimp Lieke op wie ‘t vreuger woor
Hae zaet neet väöl, hae klaag neet, en löp einzaam zeukend door

Hae zoot nag vol verhaole, zóch ’n foto in zien tas
Vaegde zich de móndj aaf mit de moe van ziene jas
Twee kinjer net wie hem mit ‘ne grote breije lach
’t Kèn zo anges loupe es wie se dich det haajs gedach
Wie op ’t werk ’t taenge zoot, hing hae toes get oppe bank
En net wie óngeneujd bezeuk kwoom bie hem de drank
Daonao ging ’t sjnel, de tesse vol mit goje raod
Nog effe bie zien broor gewoond mer daonao oppe sjtraot

En alles waat d’r haet zit in die klein plastic tas
Die d’r sjnachs versjtop in dae gevónje laere jas
De druime die d’r druimp Lieke op wie ‘t vreuger woor
Hae zaet neet väöl, hae klaag neet, en löp einzaam zeukend door

DOOT GET

Es de raekening int rood sjteit,
en doe veuls det ’t verkeerd geit, den doot get.
Es de breve blieve kómme,
haat dich den neet van de dómme, mer doot get.
Es weer alles anges oetpak, en de mood dich inne sjoon zak,
door de elenj en de zorge neet meer dinke wils aan morge,
ich zègk dich mer ein dink: doot get

Doot get, en sjtaek de kop neet in ’t zandj.
Doot get, mit det teiken aan de wand.
Doot get, want mit nieks doon los se helemaol nieks op.
Doot get, mit det jeuke van de henj.
Doot get, mit det biete oppe tenj.
Doot get, of doe hous dich later zelf veur diene kop, dus doot get.
Doot get, doot get, doot get, doot get.

Es d’r emes in de kaai sjteit,
en doe veuls det det neet good geit, den doot get.
Es se emes zuus mit vraoge,
wo de haop bie is vervlaoge, den doot get.
Es se wèts waat kènt gebeure, laot den effe van dich heure,
óm de ozel te beperke, laot get zeen of laot get merke,
ich zègk dich mer ein dink: doot get

Doot get, en sjtaek de kop neet in ’t zandj.
Doot get, mit det teiken aan de wand.
Doot get, want mit nieks doon los se helemaol nieks op.
Doot get, mit det jeuke van de henj.
Doot get, mit det biete oppe tenj.
Doot get, of doe hous dich later zelf veur diene kop, dus doot get.
Doot get, doot get, doot get, doot get.